Deialdia 2014 - Programak

Programek bete beharrekoak (57/2007 Dekretuaren 2.art).

Diru-laguntza jaso ahal izateko, aurkeztutako programek honako hauek bete beharko dituzte. Dagokion deialdiaren programa eskatzerakoan egiaztatuko dira.

a) Programaren helburu orokorrak nortasun argi bat eduki behar du, euskal erakunde eskatzailearen helburu estrategikoren batekin.

b) Berariazko helburua lortzen bada, horrek prozesuen sakontasuna bermatu behar du, sektorialean zein zeharkakoan estrategia sendoak abian jarriz. Jarduneko sektorean edo sektoreetan, jardunen bideragarritasuna, iraunkortasuna eta jarraipena bermatu behar da. Zeharkakoan, berriz, berariazko estrategien garapena bermatu behar da generoaren, tokiko ahalmenen eta parte-hartzearen alorretan, eta gutxienez jardun jakin batzuk gauzatu behar dira antolaketaren, giza eskubideen eta iraunkortasun ekologikoaren alorretan.

c) Beharrezko baliabideak jarri eta beharrezko jarduerak gauzatuko direla bermatzea, batetik, oinarrizko lerro bat ezartzeko, eta, bestetik, adierazle kualitatibo eta kuantitatiboen sistema bat ezartzeko, proiektua hasi eta handik sei hilabetera.

d) Programa herrialde pobretuetako gutxienez tokiko erakunde baten bitartez egitea. Dekretu honen bigarren kapituluko laugarren atalean tokiko erakundeentzat ezarritakoa bete beharko du tokiko erakunde horrek.

e) Jarduerak garatzea eta rubro edota partidak biltzea aurrekontu-atal bakoitzean. Aurrekontu-atalak honako hauek dira: Identifikazioa, Garapen-jarduerak, Tokiko erakundeak edo xede-biztanleriaren erakundeak indartzea, Garapenerako hezkuntza, Programa gauzatze-eremuan kudeatzea eta Programa Euskal Autonomia Erkidegoan kudeatzea.

f) Programa bakoitzeko gehienez 1.200.000 euroko diru-laguntza eskatu ahal izango da, eta, gutxienez 600.000 euroko diru-laguntza.

g) Finantziazioaren % 15ek gutxienez Euskal Autonomia Erkidegoaren Herri Administrazioak emandako laguntzaz aparteko baliabideetatik etorri behar du.

h) Dagokion deialdiaren aurrekontu-ekitaldiaren barruan hastea. Hasiera-eguna zehazteko, programa eskatzeko formularioan proposatutako eguna hartuko da aintzat. Egun horrek deialdia argitaratzen den egunaren ondokoa behar du, eta dagokion aurrekontu-ekitaldia amaitu aurrekoa.

Eskaera onartzen badute, erakunde esleipendunak proiektuaren hasiera-data eguneratzeko aukera izango du, Garapen Lankidetzarako Zuzendaritzarekin hitzarmena izenpetzen duenean. Egun hori deialdia argitaratzen den egunaren ondokoa izango da, eta dagokion aurrekontu-ekitaldia amaitu aurrekoa. Onartzeko jakinarazpenari erantzuten ez bazaio, programa aurkezteko formularioan erakunde esleipendunak adierazitako eguna hartuko da aintzat.

i) Lortutako emaitzak arrazoizko epe batean lortzea. Aurrekontua gauzatzeko gehienez 36 hilabete egongo dira, eta gutxienez 24 hilabete.

Nolanahi ere, Garapen Lankidetzarako Zuzendaritzak epe hori luzatu ahal izango du gehienez ere bi aurrekontu-ekitaldi gehiagoz, proiektua gauzatzearekin zerikusia duten zirkunstantziak direla-eta.

Administrazio-betebeharrak (57/2007 Dekretuaren 12.Art)

Egiaztatzeko, erakunde eskatzaileak honako betebehar hauek bete eta dokumentatu beharko ditu:

a) Behar bezala eratuta eta Euskal Autonomia Erkidegoko herri-administrazio bateko erregistroan erregistratuta egotea, egiaztatzeko eskaera aurkezteko eguna baino bost urte lehenago. Hori egiaztatzeko, dagokion erregistroan erregistratuta egotearen fotokopia konpultsatua aurkeztuko du.

b) Estatutuetan esanbidez adieraztea besteak beste herrialde pobretuak garatzeko ekintzak gauzatu nahi dituela. Hori egiaztatzeko, estatutuen fotokopia konpultsatua aurkeztuko du.

c) Irabaziak lortzeko asmorik ez izatea.

d) Diru-laguntzak edo laguntza publikoak lortzeko aukera galdu izanaren zigorra jaso ez izana (ez zigor penalik ez administratiborik), sexu-arrazoiengatiko diskriminazioa egiteagatiko zigorrak barne, ezta horretarako ezgaitzen duen lege-debekurik jaso ere. Hori egiaztatzeko, inolako zigorraldiren eraginpean ez egotearen zinpeko edo erantzukizuneko aitorpena aurkeztuko du.

e) Zerga-betebeharrak eta Gizarte Segurantzari dagozkionak egunean edukitzea. Hori egiaztatzeko, identifikazio fiskaleko zenbakiaren txartelaren (IFZ) fotokopia aurkeztuko du, eta baita zerga-betebeharrak eta gizarte-segurantzarekikoak egunean edukitzearen ziurtagiria ere.